Nuddele mat Langustinnen

Zoubereedung: 1 Stonn

Fir 2 Persounen : 

  • 10 Langustinnen
  • 180 g Le Moulin Tagliatelle Nr. 110

Fir de Knueweleksbotter:

  • 15 g mëlle Botter
  • 1 kleng Zéif Knuewelek
  • 1 Iessläffel Estragon, reng geschnidden
  • Salz a Peffer

Fir d’Zooss:

  • 20 g Botter
  • 1 Schalott, reng geschnidden
  • 3 Zéiwe Knuewelek, reng geschnidden
  • 1 Iessläffel Tomatepüree
  • 10 Käre schwaarze Peffer
  • ½ Téiläffel Fenchelsom
  • 1 Strauss Estragon
  • Ofgeriwwe Schuel vun ½ Zitroun
  • 280 ml wäisse Wäin
  • 170 ml waarmt Waasser
  • 60 ml Ram
  • 1 Iessläffel Maisstäerkt
  • Salz a Peffer

Schneit d’Pincë vun de Langustinnen erof an zerdréckt se an engem Mörser. Gitt se an eng Schossel a stellt se op d’Säit.

Schneit 3 Langustinnen der Längt no duerch an huelt den Daarm eraus. Leet se op e Bakblech a versuergt se am Frigo bis se méi spéit am Uewe gebak ginn.

Dréint d’Käpp vun de reschtlesche Langustinnen erof a leet se a d’Schossel mat de Pincen. Huelt d’Fleesch aus de Schwänz, huelt den Daarm eraus a stellt alles op d’Säit. Leet d’Schuelen bei d’Pincen an d’Schossel.

Schmëlzt 20 g Botter an enger grousser Pan, gitt d’Schuelen, d’Käpp an d’Pincen dobäi brot alles 2 Minutte laang, bis en delikaten Doft entsteet. Zerdréckt dobäi d’Schulen esou gutt wéi méiglech.

Gitt déi gehackte Schalotten a Knuewelekszéiwen dobäi a brot se 3 Minutte mat.

Gitt den Tomatepüree, de Fenchelsom, déi schwaarz Päfferkären, den Estragon an d’Zitrouneschuel dobäi a loosst alles eng Minutt matbroden, schëtt dono de wäisse Wäin dobäi a kacht alles ronn 3 Minutten an.

Schëtt dat waarmt Waasser dobäi, setzt den Deckel op d’Pan a loosst alles op niddreger Temperatur 5 Minutte kachen. Huelt den Deckel erof a loosst alles nach eng Kéier 3 Minutte kachen.

Schëtt d’Flëssegkeet duerch eng Passett an dréckt esou vill Flëssegkeet wéi méiglech eraus. Schëtt dono d’Flëssegkeet an eng Pan. Loosst alles nach eng Kéier opkachen an dono 5 Minutte weiderkachen. Gitt dann d’Fleesch vun de Langustinnen dobäi a loosst alles 2 Minutte kachen.

Vermëscht de Ram mat 1 Téiläffel Maisstäerkt a réiert en an d’Zooss. Loosst en opkachen, fir datt d’Zooss déckst. Schmaacht d’Zooss mat Salz a Peffer of. Stellt alles op d’Säit an haalt et waarm.

Kacht d’Tagliatelle 5 Minutten am kachende Waasser.

Stellt an der Tëschenzäit de Grill vum Uewen op héich Temperatur. Bereet de Knueweleksbotter zou, andeems Dir de Botter mam Knuewelek a mam Estragon verréiert. Wierzt mat Salz a Peffer. Verreift de Botter iwwer déi 6 Langustinnhallschenten a setzt se fir 5 Minutten ënnert de Grill vum Uewen, bis se liicht brong an duerch sinn.

Schëtt d’Tagliatelle of a vermëscht se mat der Zooss an der Pan. Verdeelt d’Nuddelen op 2 Teller, gitt jeeweils 3 gegrillte Langustinnhallschenten dobäi  an zerwéiert direkt.